ኢሳት
ታህሳስ 26 ፥ 2009
ምንጭ ጁማ ትራቭል
ዛሬ ረቡዕ ማምሻውን በባህርዳር ግራንድ ሆቴል የቦንብ ፍንዳታ መድረሱን የአይን ምስክሮች ገለጹ። ይህ ዘገባ እስከተጠናከረበት ጊዜ ድረስ በጥቃቱ ስለደረሰው ጉዳት የታወቀ ነገር የለም።
በኢትዮጵያ አቆጣጠር ከምሽቱ 2 ሰዓት አካባቢ ባህርዳር ግራንድ ሆቴል ላይ ጥቃቱን ስላደረሱት ወገኖች ማንነት የታወቀ ነገር የለም። ጥቃቱን የፈጸሙት ወገኖች ለምን አላማ እንደፈጸሙትም ግልጽ አልሆነም።
ሆኖም አዲሱን የፈረንጆች አመት በማስመልከት ባለፈው ዕሁድ ይካሄዳል የተባለውን የሙዚቃ ዝግጅት በመቃወም በባህርዳር ከተማ ወረቀት መበተኑን ማስታወስ ተችሏል።
“እናቶች ስለዚህ ትውልድ እንዳያለቅሱ፣ እንዳያዝኑ፣ እንዳይራገሙ እናድርግ” በሚል ርዕስ ባለፈው ሳምንት የተበተነው የተቃውሞ ወረቀት የወንድሞቻችንና እህቶቻችን ደም ሳይደርቅ የሚደረገውን የሙዚቃ ዝግጅት እንቃወም የሚል ይዘት እንደነበረው ለመረዳት ተችሏል። ሆኖም ይህንን ተቃውሞ የሚመሩት ወገኖች ከዚህ ጥቃት ጋር ግንኙነት ይኑራቸው አይኑራቸው ማወቅ አልተቻለም።
ጥቃቱ በተፈጸመበት ወቅት የመንግስት ባለስልጣናት በሆቴሉ እንደነበሩ የሚገልጹት ምንጮች በጥቃቱ ደጃፍ ላይ በመፈንዳቱ በሰዎቹ ላይ የደረሰ ጉዳት አለመኖሩም አመልክተዋል። የሆቴሉ ባለቤት ወ/ሮ ትልቅሰው ገዳሙ ከብአዴንም ሆነ ከህወሃት ባለስልጣናት ገር ቅርበት ያላቸው ባለሃብት መሆናቸው ተመልክቷል።
በዚሁ በባህርዳት ከተማ ከአንድ ቀን ቀደም ብሎ ማክሰኞ ዕለት አራት የኮማንድ ፖስት አባላት እስማዔል አህመድ የተባለ የ38 አመት ጎልማሳና የአራት ልጆች አባት ቤቱ ደጃፍ ላይ እንደገደሉት መዘገባችን ይታወሳል። ቅዳሜና ዕሁድ በባህርዳር በተካሄደ የትግራይ ተወላጆች ስብሰባ ላይ ህወሃት ለትግራይ ተውላጆች የጥንቃቄ ዕርምጃ እንዲወስዱ ማሳሰቡም አይዘነጋም።
