ጠገናው ጎሹ
ከረጅሙ ታሪክ በቅጡ ተምረን
ክፉውን በማረም በጎውን አፅንተን
እንዲመጥን አርገን ላለንበት ዘመን
ለስሜት ፈረሱ ልጓም አበጅተን
ከምር ተፀይፈን
የውድቀት አባዜን
ደግሞም በልክ አርገን
ከየእለት ክስተት ጋር መሞቅ መቀዝቀዝን
ከምር እምቢ ብለን
መከራ መቁጠርን
ውርደት መሸከምን
በቅጡ ሳንኖር አለን የማለትን
የውርደት አዙሪት የቁም ሙትነትን
የጨካኞች ቀንበር ሰለባ መሆንን
ሥር የሰደደውን እንቆቅልሻችን
በቃ የምንለው በአንድ ላይ አንድ ሆነን
መቼና እንዴት ይሆን?
በዓለማዊም ሆነ በሥነ መለኮት
ልሂቃን ነን እያልን የምንኩራራበት
ከማነብነብ አልፈን ነፍስ ያልዘራንበት
የከንቱ ውዳሴ የተግባር አልባነት
መሬት ላይ አውርደን ያልተጠቀምንበት
ገዳይ አስገዳይን ያልተጋፈጥንበት
ግፈኛና ግፍን ያልተፀየፍንበት
ህዝብን ከመከራ ያላወጣንበት
የዘመን ጠገቡ የውድቀት ላይ ውድቀት
መቸና እንዴት ይሆን ፈውስ የሚገኝለት?
ትምህርትና መማር በአጭሩ ሲጨመቅ
እውነት ሆኖ ሳለ የማያጠያይቅ
በጎውን የማፅደቅ ክፉውን የመናቅ
ብሎም በአርበኝነት ለነፃነት መውደቅ
ትውልድን የማዳን እውቀት በማስታጠቅ
አንቅቶ አደራጅቶ ለድል ብስራት ሰንደቅ
ተላብሶ መኖርን የሰላም ወርቃ ወርቅ
በፍቅር እየኖሩ በፍቅር የመፅደቅ
ስናበለሻሸው እንዴት አያሳቅቅ?
እንዴትስ ነው እማይጨንቅ?
እስኪ እንጠይቀው እኛኑ ራሳችን
ቆመን እያስገደልን ንፁህ ወገናችን
ደግሞ አያሌዎችን
ለእስር ለመከራ ሲዳረጉ እያየን
የሰቆቃ ጩኸት በግልፅ እየሰማን
አገር ምድረ ሲኦል እያየናት ስትሆን
እየገፈተረ ቁልቁል ያወረደን
ብለን እስክንጠይቅ ምንድን ነው ሰው መሆን?
ፍፃሜ እሚያገኘው መቸና እንዴት ይሆን?
እንደ እኔ መፍትሄው
ከሰቆቃ መውጫው
አንድና አንድ ብቻ ነው ።
አዎ! እንነጋገር ካልን ስለ እውነት በእውነት
የሸፍጠኞችና የሴረኞች ሥርዓት
የዘመናት መርገምት
በሁለገብ ትግል መነቀል አለበት።
የሰመረ እንዲሆን ፍኖተ መፍትሄው
ግቡን እንዲመታ ያሰብነው ያቀድነው
ወደ ዴሞክራሲ የመሸጋገሪያው
ትውልዳዊ ታሪክ እውን የማድረጊያው
ፈታኝ እንደሚሆን ግልፅና ግልፅ ነው።
እናም ለዚህም ነው ከዳር እየቆሙ ከመተቸት ይልቅ
ግልፅነትንና ገንቢነትን ሳይለቅ
እንደ ፋኖ አይነቱን ማገዝና ማምጠቅ
የአጋርነት አውድን ማስፋትና ማድመቅ።
__
ድጋፍ ያድርጉ :- ቦርከና ከ13 ዓመታት በላይ ነጻ መድረክ በመሆን አገልግሏል ፤ ወደ ፊትም በተሻለ ሁኔታ ለማገልገል ጥረት እያደረገ ይገኛል፡፡ ከፍተኛ የሆነ የሰው ኃይል እጥረት ስላለበት እና አስቸጋሪ በሆነ ሁኔታ ውስጥ እየሰራ ስለሆነ ችግሩን ለመቅረፍ በዓመት $5 ወይንም $10 የገንዘብ ድጋፍ የማድረግ አቅም ካለዎት እዚህ ገጽ ላይ በመሄድ ድጋፍ ያድርጉ፡፡ https://borkena.com/subscribe-borkena/
የኤዲተሩ ማስታወሻ ፡ በነጻ አስተያየት መድረድ ላይ የሚወጡ ጽሁፎች የጸሃፊውን እንጂ የቦርከናን አቋም አያንጸባርቁም፡፡
የቴሌግራም ቻናላችን ይቀላቀሉ ፡ t.me/borkena
ፌስቡክ ገጻችንን ላይክ ያድርጉ ፡ Borkena
Ethiopian News – Borkena English
