ሳሙኤል ወልዴ
አዲስ አበባ፣ ኢትዮጵያ – በቀድሞው የትግራይ ክልል ጊዜያዊ ፕሬዝዳንት ጌታቸው ረዳን ጨምሮ በሌሎች ፖለቲከኞች የተመሰረተው ዴሞክራሲያዊ ስምረት ትግራይ (ስምረት) የፓለቲካ ፓርቲ ቢሮውን በመቐለ መክፈቱን አስታውቋል።
ፓርቲው ከመቐለ በተጨማሪም በራያ እና አካባቢው ባሉ ከተሞች ተጨማሪ ቢሮዎቹን ከፍቻለሁ ብሏል።
ፓርቲው በቀጣይም ሁሉም የትግራይ የዞን ፣ የወረዳ ከተሞች ላይ ቅርንጫፍ ፅህፈት ቤቶችን እንደሚከፍትም ገልጿል።
ከህወሀት ፓርቲ ተገንጥለናል ባሉ ፖለቲከኞች የተመሰረተው ስምረት ፓርቲ ከአንድ ወር በፊት ነበር ከኢትዮጵያ ብሄራዊ የምርጫ ቦርድ ቅድመ እውቅና ፈቃድ የተሰጠው።
በአባላት ምልመላ ላይ መሆኑን የገለጸው ስምረት ፓርቲ በሚቀጥለው ዓመት በሚካሄደው ሰባተኛው ሀገር አቀፍ ምርጭ ላይ እንደሚወዳደር ይጠበቃል።
በተለይም ገዢው ብልጽግና ፓርቲ በትግራይ ለሚያደርገው የፖለቲካ እንቅስቃሴዎች ስምረት ዋነኛ አጋር ሊሆን እንደሚችልም የፓርቲው አመሰራረት እና አመራሮች እንቅስቃሴ ያስረዳል።
ከአምስት ወራት በፊት ብሔራዊ ምርጫ ቦርድ ከግማሽ ክፍለ ዘመን በላይ የኢትዮጵያ ፖለቲካ አንድ አካል የነበረው ህወሀትን ከየትኛውም የፖለቲካ እንቅስቃሴዎች ማገዱ ይታወሳል።
ቦርዱ ህወሀትን ያገደው ጠቅላላ ጉባኤውን አላካሄደም በሚል ሲሆን ህወሀት ግን የቦርዱን ውሳኔ ተቃውሟል።
የትግራይ ክልላዊ ፓርቲ ሆኖ ስራ የጀመረው ስምረት ፓርቲ ከክልሉ ውጪም አባላትን በመመልመል ላይ ሲሆን በቀጣዩ ወር ጠቅላላ ጉባኤ ለማድረግ ዝግጅት ላይ መሆኑን አስታውቋል።
ከሁለት ዓመት ደም አፋሳሽ ጦርነት በኋላ የሰከነ መስሎ የነበረው የክልሉ ፖለቲካ ህወሀት ከኤርትራ ጋር ያለውን ግንኙነት ማሳደጉን ተከትሎ ዳግም የፖለቲካው ትኩሳት እየጨመረ መጥቷል።
የህወሀት እና ፌደራል መንግሥት አለመግባባትን ለማርገብ ከሰሞኑ ከሁሉም ሀይማኖቶች የተውጣጡ የሀገር ሽማግሌዎች ወደ መቀሌ አቅንተው ተወያይተው ተመልሰዋል።
ሽማግሌዎቹ በዛሬው ዕለትም በተመሳሳይ ከጠቅላይ ሚንስትር አብይ አህመድ (ዶ/ር) ጋር መወያየታቸው ተገልጿል።
__
ቦርከናን ይደግፉ :- እዚህ ገጽ ላይ
የቦርከና ቻናልን ስብስክራይብ ለማድረግ እዚህ ይጫኑ
የቴሌግራም ቻናላችን ይቀላቀሉ ፡ t.me/borkena
ፌስቡክ ገጻችንን ላይክ ያድርጉ ፡ Borkena
Ethiopian News – Borkena English
ኤክስ ፡ @zborkena
 የፓለቲካ ፓርቲ ቢሮውን በመቐለ መክፈቱን አስታውቋል።){kind=link}