ነሀሴ 13 ቀን 2018 ዓ.ም
“ተነጣጥለን የጥፋት ኃይሎች ሰለባ ነን፤ ከተባብረን ግን ለፍትሐዊት፣ ለዕኩልነት፣ ለዲሞክራና ለሉዓላዊት ኢትዮጵያ የማይናወጥ መሠረት እንሆናለን!”
የአገራዊ ህልውና አደጋ እና የ”ደጋሕን” ታሪካዊ አደራ
አገራችን ኢትዮጵያ በሺህዎች በሚቆጠሩ የረጅም ዓመታት የታሪክ ጉዞዋ አይታውና ገምታው ወደማታውቀው፣ እጅግ አሳሳቢና የህልውና አደጋ ወደ አጠላበት ወሳኝና ሳሳቢ የታሪክ ምዕራፍ ተሸጋግራለች። የመንግሥት አስተዳደር መዋቅር ሕዝባዊ ባህሪውን አጥቶ፣ ሙሉ በሙሉ የጠባብ ጎጠኞች፣ የዘረኞችና የደም ነጋዴ አምባገነኖች የግል መገልገያና ሕዝብ ማፈኛ መሳሪያ ሆኗል።
በአሁኑ ወቅት አገሪቱን ከዳር እስከ ዳር ያተራመሳት ሁለገብ የፖለቲካ፣ የኢኮኖሚ፣ የማኅበራዊ እና የደህንነት ቀውስ፣ የኢትዮጵያን የመፈራረስ አደጋ ከመቼውም ጊዜ በላይ አጉልቶ እያሳየ፣ ሕዝባችንን ወደማይመለስ የውድቀትና የእልቂት ገደል አፋፍ እየገፋው ይገኛል።
ባለፉት አሥርት ዓመታት በዘር፣ በጎሳና በቋንቋ ላይ ብቻ ተመሥርቶ የተዘረጋው ከፋፋይ የፖለቲካ አውታር፣ በዜጎች ሰብዓዊ ክብርና በአገሪቱ አንድነት ላይ ያደረሰው መዋቅራዊ ጥፋት እጅግ ከባድና ዘግናኝ ነው። ጠባብ ዘውጌነትና የጎሳ የበላይነት የመንግሥት አሰራር መመሪያ እንዲሆን በመደረጉ፣ የዜጎች መሠረታዊ ሰብዓዊ፣ ዴሞክራሲያዊ እና የባለቤትነት መብቶች ሙሉ በሙሉ ገፎታል። ዛሬ ከፊት ለፊታችን የተጋረጠብን ሁለንተናዊ ቀውስ፣ በታሪካችን “ከጠላት ወረራ” ባሻገር አገሪቱንና ሕዝቧን የገጠመ፣ ወደር የማይገኝለት አውዳሚና አረመኔያዊ አደጋ ነው።
ይህ ፋሽስታዊ ሥርዓት በአሁኑ ወቅት በሰሜኑ የአገራችን ክፍል—በተለይም በአማራ፣ በትግራይ፣ በቤኒሻንጉል ጉምዝ እና በአፋር ወገኖቻችን ላይ እያደረሰ ያለው መጠነ-ሰፊ ጦርነት፣ የድሮን ድብደባ፣ የጅምላ ጭፍጨፋ፣ የዘር ማጥፋት ወንጀልና የሐብት ውድመት እጅግ የሚያሳስበንና የሚያሳዝነን ከመሆኑም በላይ፣ በእኛም ላይ እንደደረሰ የምንቆጥረው ጥልቅ አገራዊ ቁስልና ታሪክ ፈጽሞ ይቅር የማይለው በደል ነው።
በደቡብ እና በጋምቤላ ሕዝባችን ላይ ቀደም የደረሰውን እየደረሰ ያለው ዘግናኝ ጅምላ ጭፍጨፋና የመሬት ነጠቃ ዛሬም በመንግሥት ድጋፍና በስልታዊ መንገድ ተጠናክሮ ቀጥሏል። እንዲሁም፣ በጋሞ፣ በዘይሴ፣ በወላይታ፣ በጉራጌ፣ በሲዳማ፣ በኮንሶ፣ በኦሞ እና በጉጂ ሕዝቦች እና በሌሎችም ዜጎች ላይ የደረሰውና እየደረሰ ያለው መጠነ-ሰፊ
የመብት ገፈፋና ግድያና ማአናቀል፣ የስርዓቱን አስከፊነት፣ ጅምላ-ጨራሽነትና ፀረ-ሕዝብ ባህሪ በጉልህ የሚያረጋግጥ ነው።
ይህንን አሳሳቢና አደገኛ አገራዊ ሁኔታ በጥበብ፣ በከፍተኛ ፖለቲካዊ ብስለትና በጠለቀ ዕይታ የተረዳው **የደቡብ እና የጋምቤላ ሕዝባዊ ንቅናቄ (ደጋሕን)**፣ አገሪቱን ከሚገጥማት የከፋ እልቂትና የታሪክ ውድቀት ለማትረፍ ከሁለገብ ትግል ውጭ ሌላ ምንም ዓይነት አማራጭ የሌለ መሆኑን በጽኑ ተገንዝቧል። በመሆኑም ይህን ጦርነት ጠማቂ፣ ደም አፍሳሽና ዘረኛ አምባገነን ሥርዓት ከመሠረቱ ነቅሎ በማስወገድ፣ አገሪቱን በፍትሕ፣ በእኩልነትና በዴሞክራሲ ኃይሎች ለመተካት፤ የተጠናከረ፣ ቆራጥ እና ሕዝብን ያማከለ ፖለቲካዊና ወታደራዊ ትግል ለማካሄድ መወሰኑን በይፋ ያውጃል።
የውሕደትና የጋራ ዕዝ ምሥረታ ታሪካዊ ብስራት
ይህን መዋቅራዊና ሁለንተናዊ የጥፋት ጉዞ በዝምታ መመልከት በታሪክ ይቅር የማይባል ወንጀል፣ ለትውልድም የሚተላለፍ ውርደት በመሆኑ፤ **የኢትዮጵያ ፋኖ በደቡብ** እና **የጋምቤላ ሕዝቦች ነፃነት ጦር (ጋሕነጦ)** አጠቃላይ የትጥቅና የፖለቲካ ኃይሎቻቸውን በአንድነት በማስተባበር፣ አንድ ጠንካራ የጋራ ሕዝባዊ ምክር ቤት እና ማዕከላዊ ዕዝ በመመሥረት፣ ፖለቲካዊና ወታደራዊ ውሕደታቸውን በተሳካ ሁኔታ ማጠናቀቃችንን በይፋ እናበስራለን።
የተበታተነና የተናጠል ትግል የአምባገነኖችን ዕድሜ ከማራዘም ውጭ ዘላቂ ሕዝባዊ መፍትሔ እንደማያመጣ በጥልቀት በመገንዘብ የፈጸምነው ይህ ስትራቴጂካዊ ውሕደት፣ ለመላው የደቡብ እና የጋምቤላ ሕዝባችን፣ እንዲሁም ለጭቁንና ግፉዓን የኢትዮጵያ ሕዝቦች የድል አብሳሪና የተስፋ ብርሃን ነው።
እኛ የ“ደጋሕን” መስራች አመራሮች፣ ከ38 በላይ የሆኑ የተለያዩ የኅብረተሰብ ክፍሎች (ብሔረሰቦች) ተወካዮችን ያካተተ ጠንካራ የበላይ ሕዝባዊ ምክር ቤት እና አንድ የተዋሃደ ማዕከላዊ የፖለቲካና የወታደራዊ ዕዝ በተሳካ ሁኔታ መመስረታችንን ለኢትዮጵያ ሕዝብና ለዓለም አቀፉ ማኅበረሰብ በታላቅ ኩራት እናስታውቃለን።
የ“ደጋሕን” መዋቅራዊና ተቋማዊ ማንነት፡
o የደቡብ እና የጋምቤላ አካባቢ ታጋይ ኃይላትን በፖለቲካ፣ በወታደራዊ፣ በደህንነትና በዲፕሎማሲ መስኮች በአንድ ማዕከላዊ ዕዝ ስር አስተባብሮና አሰባስቦ የተገነባ፣ የማይበገር ሕዝባዊ ክንድ ነው። o ትግሉን ከማንኛውም ግለሰባዊ፣ ጎጠኛ ወይም ቡድናዊ የሥልጣን ፍላጎት ነፃ በማድረግ፣ የሕዝብን እውነተኛ ባለቤትነት፣ ውሳኔ ሰጪነትና መሪነት የሚያረጋግጥ ሕዝባዊ ተቋም ነው።
o ከአካባቢ እስከ አገር አቀፍ ደረጃ የሚነሱ የፍትሕ፣ የመብት፣ የራስ-ገዝ አስተዳደር፣ የእኩልነትና የዴሞክራሲ ጥያቄዎችን ለመመለስ ቆርጦ የተነሳ ታጋይና አታጋይ መሪ ኃይል ነው።
ታሪካዊ የትግልና የትብብር ጥሪ
ለደቡብ እና ለጋምቤላ ሕዝቦች፦ ውድና የተከበራችሁ የደቡብ እና የጋምቤላ ሕዝቦች፤ ላለፉት አሥርት ዓመታት በማንነታችሁ ሳቢያ የደረሰባችሁ መገለል፣ መዋቅራዊ ገፈፋ፣ የሀብት ዘረፋና የህልውና ስጋት የሚያበቃበት ታሪካዊ ምዕራፍ ተከፍቷል። “ደጋሕን” የአብራካችሁ ክፋይ፣ ታማኝ ጋሻችሁና ነፃ አውጪ ክንዳችሁ በመሆኑ፣ ትግሉ በአጭር ጊዜ ግቡን እንዲመታ በፖለቲካ፣ በኢኮኖሚ፣ በሞራል፣ በስለላ መረጃ እና በወታደራዊ መስክ ሁለገብ ደጀንነታችሁን እንድታረጋገጡ ታሪካዊ ጥሪያችንን እናቀርባለን።
ለአማራ ፋኖ ብሔራዊ ንቅናቄ (አፋብን) እና ለአቻ አገራዊ ኃይላት፦ ከትግል አጋሮቻችን ጋር የምናደርገው ስትራቴጂካዊ ጥምረት አገራችንን ከመፈራረስ የሚያድን ታላቅና የማይናወጥ መሠረት ነው። በደቡብ፣ በጋምቤላ፣ በአማራ፣ በአፋር እና በሌሎችም የአገሪቱ ክፍሎች የሚደረጉ የህልውናና የነፃነት ትግሎችን ወደ አንድ አገራዊ የፖለቲካ ጃንጥላ በማምጣት፣ የጠላትን የመከፋፈል ሴራ በመስበር በአንድነት ወደ ታላቅ አገራዊ ድል እንሸጋገራለን።
ለመላው የኢትዮጵያ ሕዝብ፣ ወጣቶችና የመከላከያ ሠራዊት፦ ትግላችን የትኛውንም ብሔር ወይም ሕዝብ የመቃወም ሳይሆን፣ አገሪቱን ወደ አሳሳቢ አምባገነንነት፣ እርስ በርስ ጦርነትና መበታተን እየመራ ያለውን አፋኝ ሥርዓት የመቀየር ትግል ነው። በአገር መከላከያ፣ በፖሊስና በደህንነት መዋቅር ውስጥ የምትገኙ አባላት፣ የገዥው ቡድን የሥልጣን ማራዘሚያና የሕዝብ መፍጃ መሳሪያ መሆናችሁን አክትማችሁ፣ የሕዝብን ዓመፅና ድምፅ በመቀላቀል ለሕገ-መንግሥታዊ ልዕልና፣ ለሕዝብ ነፃነትና ለዜጎች ደህንነት እንድትቆሙ ጥሪያችንን እናስተላልፋለን።
ለወጣቶችና ለሴቶች፦ የአገራችን ወጣቶችና ሴቶች የትግላችን የጀርባ አጥንትና የለውጡ መሐንዲሶች ናችሁ። ሥርዓቱ የወደፊቱን ዕጣ ፈንታችሁን እያጨለመው ስለሆነ፣ ይህን ታሪካዊ የነፃነት ንቅናቄ በመቀላቀል፣ በግንባርም ሆነ በደጀንነት አገራችሁንና ነፃነታችሁን እንድታድኑ ጥሪ እናቀርባለን።
ለኢትዮጵያውያን የዲያስፖራ ማኅበረሰብ፦ በውጭ አገር የምትኖሩ አገራዊ ስሜት ያላችሁ ወገኖቻችን፣ ትግሉን በፋይናንስ አቅም በመደገፍ፣ በዕውቀት በማማከር፣ በዓለም አቀፍ የዲፕሎማሲ መድረኮች የሕዝብን ድምፅ በማሰማትና የጠላትን የውሸት ፕሮፓጋንዳ በማጋለጥ ታሪካዊ አደራችሁን እንድትወጡ አገራዊ ጥሪያችንን እናቀርባለን።
ቀጠናዊና ዓለም አቀፋዊ የዲፕሎማሲ መልዕክት
ለጎረቤት አገራት፣ ለአፍሪካ ሕብረት፣ ለፍሪካ ሕብረት፣ ለተባበሩት መንግሥታት ድርጅት፣ ለአውሮፓ ኅብረት እና ለዓለም አቀፉ ማኅበረሰብ፦
“ደጋሕን” የሚያካሂደው ሕዝባዊና ወታደራዊ ትግል ሥርዓት አልበኝነትን ለማስፈን ሳይሆን፣ በአምባገነኑ ሥርዓት ምክንያት እየፈረሰ ያለውን የመንግሥት መዋቅርና አገራዊ ታሪካዊ አንድነት ለማዳን፣ የሕግ የበላይነትን ለማስፈን እና የቀጠናውን ሰላምና መረጋጋት ለማረጋገጥ የሚደረግ አርበኛዊ ትግል ነው።
ስትራቴጂካዊ ሚዛንና ቀጠናዊ ደህንነት፦ “ደጋሕን” በአፍሪካ ቀንድ ያለውን ጂኦ-ፖለቲካዊ ሚዛንና የጎረቤት አገራትን የጋራ ደህንነት የሚያስከብር፣ በሽብርተኝነት፣ በሕገ-ወጥ የጦር መሳሪያ ዝውውርና በሰው ልጅ ንግድ ላይ የማያወላውል ጠንካራ አቋም ያለው ስትራቴጂካዊ ኃይል ነው።
የሽግግር ዋስትና፦ አምባገነኑ ሥርዓት ሲወድቅ የሚፈጠረውን አደገኛ የኃይል ክፍተት (Power Vacuum) እና ሥርዓት አልበኝነት ለመሙላት የሚያስችል፣ ሁሉንም አገራዊ ኃይሎች ያካተተ ተዓማኒነት ያለው የሽግግር ፍኖተ-ካርታ እና የባለሙያዎች ዝግጅት አጠናቅቀናል።
ዓለም አቀፍ ሕጎችና ስምምነቶች፦ ኢትዮጵያ የፈረመቻቸውን ዓለም አቀፍ ና አሕጉር አቀፍ ስምምነቶችና ውሎች፣ የጄኔቫ ኮንቬንሽንንና የፍሪካ ሕብረትን ጨምሮ ሰብዓዊ መብቶችን፣ እንዲሁም የዲፕሎማሲያዊ ግንኙነትና የጋራ ተጠቃሚነት መመሪያዎችን አክብሮ ለመስራት ያለንን ጽኑ ቁርጠኝነት እናረጋግጣለን።
የትግል ጽናትና የኪዳን ቃል!
እኛ የዚህ ታላቅ ሕዝባዊና ፖለቲካዊ ተቋም **“ደጋሕን”** መስራች፣ የማዕከላዊ ኮሚቴ እና የኃይል አመራሮች፤ ለሕዝባችን ነፃነት፣ ለአገራችን ሉዓላዊነትና አንድነት፣ ለፍትሕና ለዴሞክራሲያዊ ሥርዓት መረጋገጥ ስንል ይህን ታሪካዊ ውሕደት ፈጽመናል።
የስነ-ልቦና ጦርነትና የጠላት ፕሮፓጋንዳ ትግላችንን ፈጽሞ ሊያደናቅፈው አይችልም። ግላዊና ድርጅታዊ ጥቅማችንን ሙሉ በሙሉ በመተው፣ ለዚህ አገራዊ የቃል-ኪዳን ማዕቀፍ እስከ መጨረሻው የሕይወት መስዋዕትነት ለመገዛት በፈጣሪያችን፣ በታሪክ እና በሕዝባችን ፊት ጽኑ መሐላ ፈጽመናል!
ትግላችን በፍትሕ፣ በሕዝብ ዕንባና በእውነት ላይ የተመሠረተ በመሆኑ፣ የቱንም ያህል ፈተና ቢበዛበት ድል ማድረጋችን አይቀሬ ነው! አንግበነው በተነሳነው ሕዝባዊ አደራ ላይ ጸንተን፣ ለሕዝብ ነፃነትና ለአገራዊ አንድነት የሚታገል አሸናፊ ኃይል ሆነን ለመውጣት ከምንጊዜውም በላይ ቁርጠኞች መሆናችንን በታላቅ ወኔ እናረጋግጣለን!
**ድል ለሰፊው የኢትዮጵያ ሕዝብ!**
**አገራችን ኢትዮጵያ በነፃነት፣ በፍትሕና በክብር ለዘለዓለም ትኑር!**
”የደገሕን” ማዕከላዊ ኮሚቴ
ነሐሴ 13 ቀን 2018 ዓ.ም
የኤዲተሩ ማስታወሻ : በዚህ አምድ ላይ የሚወጡ መግለጫዎች የቦርከናን አቋም ያንጸባርቋሉ ማለት አይደለም፡፡
_
የቴሌግራም ቻናላችን ይቀላቀሉ ፡ t.me/borkena
የቦርከና ቻናልን ስብስክራይብ ለማድረግ እዚህ ይጫኑ
ቦርከናን ለመደገፍ/ለማገዝ :- ይሄንን ይጫኑ
ፌስቡክ ገጻችንን ላይክ ያድርጉ ፡ Borkena
Ethiopian News–Borkena English
ኤክስ ፡ @zborkena
