የኢትዮጵያ ሕዝባዊ ኃይሎች ትብብር ለሕልውና (ትብብር ለሕልውና) መመስረቱን አስመልክቶ  ከአማራ ማኅበራት ትብብር በአሜሪካ የተሰጠ መግለጫ  

ሲጀመር በሰው መቃብር ላይ የሚለመልም ምንም ሃገር የለም። በመቀጠል በስም ተጠቅሰው የትብብሩ አካል ናቸው የተባሉት ሁሉ ብሄርተኞችና ለራስ ሲቆርሱ የማያሳንሱ ናቸው። ሃገርና ህዝብ በብሄር በመደራጀት ነጻ ማውጣት አይቻልም። እንግዲህ የጨነቀው እርጉዝ ያገባል እንዲሉ በውስጥና በውጭ ሃይሎች እየተደገፉ 4 ኪሎ እንደርሳለን የሚሉን ታጣቂ ቡድኖች ሁሉ በብሄርና በክልል ፓለቲካ ጢንቢራቸው የዞረ ነው። ከተሰላፊዎቹ ሁሉ በጣም የሚገርመው ደግሞ የፋኖ ከወያኔና ከሻቢያ ጋር አብሬ እታገላለሁ ማለቱ ነው። ማን ሆነና ለአማራ ህዝብ የዘመናት ሰቆቃ ምክንያቱ? ወያኔ በተደጋጋሚ በከፈተው ጦርነት ሽዋ ድረስ ገብቶ እየፈለገ ያጠፋቸው እነማን ነበሩ? እንዴት ያ ይረሳል? የማን ንብረት ነው ተጭኖ ወደ መቀሌ የተጓዘው? በቅርቡ አንድ የወያኔ ወታደራዊ ባለስልጣን ሲናገር ከወሎና ከወልዲያ ብቻ የተዘረፉ 60 ተሽከርካሪዎችን ለጄ/ታደሰ እኔ መቀሌ ላይ ሰብስቤ አስረክቤአለሁ ብሎናል። ያ ከማን የተዘረፈ ንብረት ነበር? በትምህርት ተቋማት፤ በመንግስት መገልገያ ማዕከላት፤ የግል ባለሃብቶች ንብረትን ወዘተ ያወደመው ማን ነበረ? ወያኔ አልነበረም በቀይ ቀለም በየግድግዳው እየጻፈ አማራን ይዘልፍ የነበረው? ከዚህ ድርጅት ጋር ነው ዘመነ አብሬ እሰራለሁ የሚለው። የጅል ቀኑ አይመሽ ይላሉ አበው። ከወያኔ/ከሻቢያ እንዲሁም ከግብጽና ከሱዳን ጋር ተጣምሮ ኢትዮጵያዊነትን ማጉላት ፈጽሞ አይቻልም። ለዚህ ነው እስክንድር ነጋ “ለአፋበን ፓሊት ቢሮ” በማለት በጻፈው ደብዳቤ ላይ ተቃውሞውን ያሰማን።
ይህ የ 7ትም ሆነ የእልፍ የታጣቂ ስብስብ በእኔ እይታ ሃገር ለማፍረስ፤ ህዝብ ለማስጨረስ፤ በዚህ የኑሮ ውድነት ህዝባችን ያለውን ቆርጥሞ እንኳን እንዳይሰነበት የመከራ ዶፍ ከማውረድ ውጭ አንድም ፍሬ ነገር አያስገኝም። የሃገራችን ተረት እንደሚለው “99 መርፌ አንድ ማረሻ አይወጣውም”። ህዝባችን የናፈቀው ሰላም እንጂ ያዙኝ ልቀቁኝ እያለ በህዝባችን ስም የሚነግድ ታጣቂ ሃይል አይደለም። በተደጋጋሚ እንዳልኩት ያልተሄደበት ብቸኛ መንገድ የሰላሙ መንገድ ነውና በውይይት በሰላምና እርቅ ነገሮችን ማስከን አስፈላጊ ነው ባይ ነኝ። አዎን የስማ በለው አዋጊዎችና በብሄርና በቋንቋቸው የሰከሩ ሁሉ ይህ ሃሳብ ሰውን ከትግል ለማዘናጋት ነው ይላሉ። ግን ያለፍንበትን መንገድ የቆየና የአሁኑን በማመላከት ሲሞገቱ ዝም፤ ጭጭ ይላሉ። ይህ የሆያ ሆሄ ፓለቲካ ሃገር እንዳፈረሰና እልፍ የሃገሪቱን ምርጥ ልጆች እንደበላ ታሪክ መዝግቦ ይዞታል። ይህ አካታች ነው የተባለለት ትብብርም ፉርሽ ለመሆኑ ገና ከጅምሩ መረዳት ይቻላል። የሻቢያ ፍላጎት ጦርነቱ ትግራይ ላይ እንዲሆን ነው። የወያኔ ፍላጎት ደግሞ ውጊያው አማራ ላይ እንዲሆን ነው። ይህ የሴራ ፓለቲካ አይኑን አፍጦ የመጣበት ደግሞ የብልጽግናው መንግስት ነው። ብልጽግና እንበለ ፍርድ የታሰሩ፤ የተሰወሩትን ሁሉ ያለምንም ቅድመ ሁኔታ መፍታት አለበት። የፈለገ አካታች ነው ከተባለው ድርጅት ጋር ይሰለፍ። ያልፈለገ በሰላም በፈለገው ስፍራ የመኖር መብቱ መከበር አለበት። አሁን ባለችው ኢትዮጵያ የክልል ፓለቲካው በዚህ በዚያም እሳት እየጫረ ሰው በሰላም ገብቶ መውጣት የማይችልበት ሃገር ሆናለች። ለዚህ ሁሉ የሴራው ቀማሪዎችና ተግባሪዎች ብሄርተኞች ናቸው። ለዚህ ሁሉ ክፋትና ሽብር በቀጥታም ሆነ በእጅ አዙር እሳት የሚያነደውና የሚቆሰቁሰው ወያኔ ነው። ሌሎቹ ሁሉ ተለጣፊ ድርጅቶች ናቸው። ከወያኔ ጀርባ ሻቢያ/ግብጽ/ሱዳንና ሌሎችም በተዋረድ ተሰልፈዋል። ብልጽግና ለወያኔዎች ያኔም አሁንም ስስ ልብ አለው። ያኔ ፕ/መስፍን ወልደማሪያም በአንድ ወቅት እንዳሉት ወያኔዎችን ለቅሞ ለእስር ዳርጓቸው ቢሆን ኑሮ ዛሬ ላይ ሃገሪቱ ከመላ ጎደል ሰላም በሆነች ነበር። ያ ይቅር ከሁለት ሶስት ጊዜ በላይ ጦርነት ከፍተው ይባስ ተብሎ ከ20 ዓመት በላይ በትግራይ ያገለገለውን የስሜን ጦር በዘርና በጎሳ ለይተው የፈጅትን አረመኔዎች ከእስር ፈቶ ውጭ እንዲሻገሩ፤ ተራፊዎቹ ደግሞ መቀሌ ላይ ከትመው ህዝብን እያሸበሩ አሁን እንሆ በአካታች ሃይል ስም 6 የታጣቂ ሃይሎችን አሰልፈው እየተፋለሙት ይገኛሉ። ጠ/ሚሩና በዙሪያው ያሉት ሁሉ ልበ ቢሶች ናቸው። ሰዶ ማሳደድ ካማረህ ዶሮህን በቆቅ ለውጥ እንዲሉ ነው የሆነው። ወያኔዎች ዛሬ በአዲስ አበባ በህቡዕና በይፋ ድጋፋቸውን ለወያኔ ይገልጣሉ። ሃብት ንብረታቸው አልተነካም። ብልጽግና ግን የተለከፈው አማራን በማሳደድና የኢትዮጵያ ኦርቶዶክስ ቤ/ክርስቲያንን በኦሮሞ ካድሬዎች ማሳደድና ማጨናነቅ ነው። አሁን ማን ይሙት መስከረም አበራ መታሰር ነበረባት? ለዚህ ነው የሃበሻ ፓለቲካ ጥንብ ነው የምንለው። በወረፋ መገዳደልና መታሰር። ያኔ ወያኔ ያሰራቸው የኦሮሞ ተወላጆች ዛሬም በብልጽግና እስር ላይ ናቸው። ያኔ ወያኔ የገረፋቸው የአማራ ተወላጆች ዛሬም በብልጽግና ይዋከባሉ። ይህ ከንቱ ፓለቲካ አይደለም የሚሉን ሁሉ አብሾ የጠጡ ብቻ ናቸው፡፡
በቅርቡ አቶ አንዳርጋቸው ጽጌ ብልጽግና አልቆለታል፤ የፈረንጆችን አዲስ አመት አይዘልቅም ገለ መሌ እያለ ሲለፈልፍ ማን ከየመን እንዳፈነው፤ በማን ምህረት እንደተደረገለት ረስቷል። የሽግግር መንግስት ናፋቂው አቶ አንዳርጋቸው እድሜ ልኩን የሃበሻ ፓለቲካ እንዳኘከ እንሆ ወደ መቃብር እየቀረበ ነው። ብልጽግና ይውደቅ አይውደቅ ማንም የሚያውቅ የለም። ጻድቃንስ ከማን ጋር ነው የምንደራደረው ጦርነቱ እኮ አልቋል አላለንም ነበር። እርሱ ዛሬ የት ነው ያለው? ፓለቲከኞች እንደ መንፈቅ ህጻን ናቸው የሚያስለቅሳቸውንም ሆነ የሚያስቃቸውን ለይተው አያውቁም። ሃገር በዘረኞች ስብስብ ህብረብ ሄራዊነትና ሰላም ሊኖራት አይችልም። ያለው የሰላም አማራጭ የጠራ የፓለቲካ ጥያቄ በማቅረብ፤ በሃሳብ ፍትጊያ ሃሳብን ተቀብሎና አካፍሎ ሰላማዊ የሆነው መንገድ ብቻ ነው። አይ በጦርነት እናሳካለን የሚሉን ካሉ እሺ መንገድን ጭርቅ ያድርግላችሁ። እንኳን 7 ድርጅት አንድ ላይ ይቅርና አንድ ድርጅት እንኳን ስንት ጊዜ ሲቀደድ ሲሰፋ አይተናል። የማይተማመን ባልንጀራ በየወንዙ ይማማላል እንዲሉ ፍጻሜአችሁን ለማየት እድሜ ይስጠን። የእኔ ምክር ግን ሳይመሽ፤ ብዙ ንብረትና ህይወት ሳታጠፉና ሳታስጠፉ ሰላምን መርጣችሁ ለዳግመኛ ድርድር መንገድ ክፈቱ። ጦርነት ለራሺያና ለዪክሬንም አልበጀ። ለእስክንደር ነጋ ያለኝ መልዕክት የእስር ትዕዛዝ ከወጣብህ በዚህም በዚያም ብለው ያጠፉሃል። በጊዜ ከብልጽግና ጋር ተደራድረህ ወደ ሰላም ተመለስ! ሃሳብንና መንገድን መቀየር መሸነፍ አይደለም። ብልህ መሆን እንጂ!